HMANGAIHNA THIL THLAWN PEK (Nobel Peace Prize a dawn tuma Mother Teresa Thusawi laktawi)

                              Vawiin a hun tha  kan chantlan avang hian Pathian hnenah  lawthu i sawi ang u. Lal Isuan  a rawn thlen remna avang hian i lawm bawk  ila. He Chanchin Tha rawn thlen tur hian Ani chu “mihringte anga lo piangin, bawih angah a rawn insiam a, amah leh amah a rawn in titlawm” a ni. Chu chanchin chu mi tin tana chanchin tha, chanchin lawmawm – mi zawng zawngin kan duh em em "thinlung muanna" a ni.”Pathianin khawvel a hmangaih em em a, A fapa mal neih chhun a pe a.” Hmangaih thil thlawn pek a ni, Pa tan chuan a fapa neihchhun pek chu a na ve ngei ang. Mahse min hmangaihna avang chuan a tul si.Chanchin Tha thlen tura mihring anga rawn pian mai chu tawk a la ti lo, a hmangaihna famkim lantirin krawsah, nang leh kei , pharte leh riltam retheite tan a nun a hlan a. Ani'n min hmangaih anga inhmangaih tawn ve turin min phut a ni.            Khawthlang rama kan zin tuma kum lama upate an enkawlna In kan tlawh tuma ka thil tawn kha ka ka hre reng thin. Chung Pitar leh Putar chu, Chu institution ah chuan an fanute, an fapaten an dah lut a, an hre zui ta reng reng lo ni berin a lang. Chu hmunah chuan an mamawh tin reng - chaw tha, TV, infiamna chi hrang hrang.. engkim hi a awm a ni ber mai. Mahse kawngka lamah chuan an hawi thuap ringawt vek mai a. Tuma hmelah chuan nui hmel chu sawiloh, hlim hmel hmuh tur pawh a awm lo.            A enkawltunu hnenah chuan " Engah nge hetah nuamsa takin an awm a, kawngka lamah an hawi thuap ringawt? Ngatinge tu hmelah mah hian nui hmel a lan loh? " tiin ka zawt ta ngawt a. (Kan mite hmelah nui hmel ka lo hmu thang ve tawh bawk nen... An thi tur pawh hlim hmel pu chungin an kal mai thin a ni si a) A ni chuan, " Heihi nitin deuhthaw a thil awm dan alom. An faten an rawn tlawh beiseiin kawngka lam kha an melh reng mai a ni. Thlauhthlak an nihna hian hliam nasa tak a siam hlawm a ni." tiin min chhang a.            Inthlahthlamna hian rilru leh thlarau retheihna a thlen. A pawi khawp mai. Kan chhungkuaah khawhar an awm em? Lungkham buaina tawk an awm em? Mal ngawih ngawiha inhria an awm em? Thlahthlam/thlauhthlak ni a inhria an awm em? An tan kan awm em? An chhungte kan nih angin kan theih tawp kan chhuahpui em? Lal Isua chuan na tinreng tuarin a nunna min pe a ni lawm ni. Keini pawhin kan tan pawha a nat ve ngaih thleng an tan kan inhlan ve dawn lawm ni.            Miretheite hi mi ropui tak an ni. An hnen atang hian hringnun zirlai mawi tak tak zirtur tam tak a awm a ni. Heng mite hian ei leh in tur, silhfen leh chenna tur in pawh an nei lo, amaherawhchu chhungril hausakna, thlarau lam chakna mak tak an nei tlat a ni. Khawvel thil hlu chu an nei hauh lo mahse ropuina tak hi an nei.
            Tlai khat chu kawtthlerah kan chhuak a, mi pali kan khawm. An zinga pakhat chu a dinhmun a tha lo hle mai a. Sister-te hnenah chuan " midang pathumte kha lo buaipui ula, keiin a na ber hi kan bawihsawm ange" ka ti a. Tichuan, ka hmangaih leh lainat thiam ang tawk chuan ka enkawl a, khumah ka mut ta a. Ka kutah chuan a rawn vuan a, hlim hmel pu sang in min rawn melh pah chuan "Ka lawm e" a ti sap a. A thi zui chu a ni ta mai a.
            He thil thleng hian ka nun chhung ril inbihchianna nei lo thei lovin min siam ta tlat mai.. A dinhmuna ding kha ni ila eng thu nge ka sawi ang? A chhanna chu ka chiang khawp mai. Mahni inkhawngaihin ka inngaihtuah lungchhia anga.. "Ka ril a tam, ka van chau tak em, awi ka thi" tih vel bak sawi tur ka hre hauh lovang le. A ni erawh chuan hmangaihna mit a min enin lawmthu min hrilh a. Hlim hmel pu chungin a ni a hringnun a thlah liam ni.Kawr atanga kan chhar, thil lung ( worms) in a taksa chanve deuh thaw a ei sak tawh hi a awm bawk a. Home a kan hruai haw chuan, " Ransa ang maiin kawtthlerah chuan ka khawsa a, mahse angel ang maiin ka thi dawn a nih hi, hmangaih leh lainat taka enkawlna hnuaiah" a ti a. A taksa a thil lung zawng zawng kan tihfai hnuah chuan, nui sang chunga a thusawi chhun chu,” Sister, Ka Pa Pathian hnenah ka haw dawn" tih a ni. A kal ta reng tak tak a. Khatiang taka mi ropui, midangte demna tawng ka chhuah miah lo leh mahni dinhmun chhia pawh ngaihtuah lova midangte tana hlim hmel la hmuhthei zawk kha an va hlu em. A ni chuan a neih a thih dawnah pawh a neih chhun, a bawihsawmtu rilru nawmna turin a hlim hmel min pe a ni.